INDEPENDENTISTAK
Sarearen liburu berria:
“ESKOZIA.
Independentziara bidaia XXI. mendeko Europan”
XXI mendeak aukera berriak ekarri ditu
independentistontzat eta, Europan bertan, zenbait prozesu
independentista jarri dira martxan eta urratsak egiten ari dira.
Eskozia eta Kataluniari begira gaude, batez ere, momentu honetan.
Egia esan, bi herrialde hauetan, lehenengo Eskozian eta gero
Katalunian, jauzi handiak egin dituzte denbora laburrean.
Eskoziaren kasuan Erresuma Batuko
gobernuarekin adostutako erreferendum binkulantea 2014ko irailaren
18an burutuko da eta baiezko emaitza batek zuzenean
independentziarako bidea zabalduko lioke.
Kontua da Eskoziako gaia eztabaida
politikoaren erdi erdian jarriko dela erreferendumaren data hurbildu
ahala eta ez daukagula prozesu eskoziarrari buruzko informazio
handiegirik. Gertakizun oso garrantzizkoak edo urrats zehatzak izaten
direnean heltzen zaigun informazio puntualetik kanpo ez daukagu
bertako prozesuaren gorabeherak jarraitzeko aukera handirik.
Euskal herritar askok prozesua
ulertzeko eta bere burua eztabaidan kokatzeko Eskoziari buruzko
informazioaren beharra sentitzen dut, eta ez dago, euskaraz ez
gazteleraz, material egokirik argitaratuta.
Behar horri erantzuteko asmoz,
Eskoziari buruzko oinarrizko materiala sortzea erabaki genuen.
Eskoziako historia eta ezaugarri Identitario, kultural, ekonomiko,
sozial eta politikoak, eta prozesu independentistaren gakoak aztertu
eta formatu labur eta ulergarrian, erraz irakurtzeko moduan, eskaini
nahi dizkiegu herritarrei. Hots, Independentistak Sarean geure Ideien
Faktoriaren bitartez Eskoziari buruzko liburu baten argitalpen
lanetan sartuta ibili gara azken hilabeteotan. Eta, azkenik, liburua
kalean izango da datozen egunotan, formato elebikoitzean, euskaraz
eta gazteleraz.
Ikuspuntu aniztasuna bermatzeko asmoz,
nazioarteko gaiak orokorrean eta Europako sezesio prozesuak bereziki
ikertu dituzten hiru aditurekin kontatu dugu azterketa lanerako.
Robin McAlpine, Xavier Solano eta Txente Rekondo izango dira liburua
idatziko dutenak, eskoziarra lehena, kataluniarra bigarrena eta
Euskal Herrikoa azkena. Toki desberdinetatik begiratuta Eskoziako
prozesua oso ondo ezagutzen dutenak hirurak:
· Robin McAlpine
Jimmy Reid Fundazioaren zuzendaria eta
Scottish Left Review aldizkariaren editorea. Eskoziako
politikagintzan 20 urtetik gora darama lanean.
·Xavier Solano
Politologoa. Erresuma Batuko
Parlamentuko parlamentari eskoziarren aholkulari politikoa. Scottish
National Partyko buruen aholkularia Eskoziako Parlamentuan. 2008 eta
2011 bitartean, Catalunyako Generalitatearen Gobernuko ordezkaria
Erresuma Batua, Irlanda eta Islandian. “El
mirall escocés”
liburuaren egilea.
· Txente Rekondo
Komunikazio Zientzietan Lizentziaduna
eta Zientzia Politikoetako Ikasketa Aurreratuetan Diplomaduna.
Nazioarteko politikan aditu oso ezaguna. Ehunka artikulu eta analisi
politikoren egilea, etengabe kolaboratu du Euskal Herriko, espainiar
Estatuko eta Latinoamerikako hainbat komunikabidetan. Gaur egun
Russian Today eta Hamaika Tb. telebistetan parte hartzen du. Udako
Euskal Unibertsitateko (UEU) ikastaro desberdinen koordinatzaile eta
zuzendaria.
Hiru adituon ekarpenak era
koordinatuan landu dira eta osagarriak dira. Alde batetik,
Eskoziaren historia, kultura, arlo ekonomiko eta soziala, egituraketa
instituzionala eta abar jorratu dituzte era laburrean, egungo egoera
ulertzeko oinarrizko informazio giza. Bestetik, era sakonagoan, azken
urteotako bilakaera, prozesu independentistaren ezaugarriak eta
zergatiak, bere kokapena Europako testuinguruan, erreferendumaren
inguruko gakoak, eta aurrera begira zabaltzen diren eskenatoki eta
aukerak. Liburuaren hitzaurrea Jule Goikoetxea, EHUko irakasleak,
idatzi du.
Ziur gaude liburuaren edukia aberatsa
eta erakargarria dela, eta, horrez gain momentu guztiz egokian
plazaratuko dena, jendartean gaiari buruzko interes oso handia duen
unean. Independentziaren gaia eztabaida politikoaren erdi erdian
kokatuta dagoenean etengabe izango direnez Eskoziako prozesuari
buruzko erreferentziak, uste dugu liburu hau oso egokia eta
beharrezkoa dela jendeak bere burua kokatzeko eta eztabaidan parte
hartzeko.
Liburua GARA egunkariarekin batera
izango da salgai kioskoetan azaroaren 1, 2 eta 3an. Gure asmoa
liburua ahalik eta gehien zabaltzea denez, eskaini diguten aukera
honetaz baliatuko gara Euskal Herriko bazter guztietan eskuragarri
dagoela bermatzeko. Ondoren, Durango Azokan ere aurkeztuko dugu eta
liburutegietan izango da.
INDEPENDENTISTAK
Sarea
Comentarios