Sopelanatik Sopelara izen ofiziala aldatzeko prozedurea martxan
Sopelako Udalak
lehen pausuak emon ditu udalerriko izen ofiziala aldatzeko, gaur egungo
Sopelanatik Euskaltzaindiak araututako Sopelara, hain zuzen be, Udal
bizkaitarretik adierazo dabenez.
2012ko zemendiaren 29an, Saioa Villanueva
Sopelako alkateak Euskaltzaindiari gutuna bialdu eutson, udalerriko izen
ofizialagaz loturea eben txosten guztiak udaletxean jasoteko asmoz.
Akademiak dokumentazinoa biadu eban, eta udalerriko izen zuzena Sopela
dala berretsi eban. Beraz, Sopelako Udal Gobernuak izena aldatzeko
prozedureagaz hastea erabagi, eta proposamena aurkeztu eban urtarrilaren
21ean egindako Euskara, Hezkuntza eta Kultura Batzordean. Betitxe
Saitua aitatutako batzordeburuak holan eskatu ostean, Xabier Kintana
Euskaltzaindiako idazkariak eta Mikel Gorrotxategi Onomastika
batzordearen idazkariak batzordean parte hartu eben. Bertan, Alkatetzeak
egindako proposamena aztertu zan (izen ofiziala aldatzea proposatzen
dauena), eta Euskaltzaindiak azken urteetan egindako hainbat ebazpen
aztertu ziran.
Kontuak kontu, 1979an Euskaltzaindiak osotutako
Euskal Herriko Udalen Izendegian, Akademiak onartu eta gomendatu eban
izena Sopela izan zan, eta 1986an berretsi egin eban erabagi hori Euskal
Herriko Euskal Autonomia Erkidegoko herrien izendegian.
1987ko urriaren 28an, Onomastika Batzordeko
Idazkari eta Euskaltzaindiako lehendakariorde Jose Luis Lizundiak
erespena emon eban eta Sopelako Udalera bialdu, Sopelako udalerriaren
izenean euskal berba akademikoa Sopela dala argituz, Sopela dalako
eskualdeko euskaldunek herria izentetako erabilten daben ohiko izena,
toponomastikearen arau orokorrari jarraituz, bokalen arteko 'n'-a
galduz. Era berean, 1997. urtean, Euskaltzaindiak beste erespen bat emon
eban aurrekoa berretsiz. Sopelana izena, barriz, udalerriari deitzeko
erromantze bersinotzat har daiteke jatorri erromanikoagaz loturea
eginaz.
Osoko bilkurara
Proposamena batzordean behin aurkeztuta, hurrengo
pausua udal osoko bilkuran eztabaidatzea izango da. Alderdi politikoek
proposamena aztertzeko aukerea izan deien, udalerriko izen ofizialaren
aldaketea zezeileko ohiko udal bilkurako gai-zerrendan egongo da,
urtarrilekoan egon beharrean.
Era berean, Sopelako Udalak udalerriaren izen
ofiziala aldatzeko prozedurea hasi dauen bitartean, Eusko Jaurlaritzeak
be aukera hori aztertzeko eskatu deutso Sopelako Udalari. Urtarrilaren
25ean, Patxi Baztarrika Eusko Jaurlaritzako Hizkuntza Politikarako
sailburuordeak gutuna bialdu eutson Sopelako alkateari. Bertan, egungo
Sopelana izen ofizialak Euskaltzaindiak araututako euskal izenagaz, hau
da, Sopela izenagaz bat ez datorrela gogorarazoten dau. Hori dala eta,
Udalari prozedurea hasteko aukerea azter daiala eskatzen deutso.
Bizkaie!
Bizkaie!
Comentarios