BIZKAIKO UDALERRIETAN INGURUMENA HOBETZEKO 55 PROIEKTU ABIARAZI DITU FORU ALDUNDIAK, 4,5 MILIOI EUROREN BITARTEZ

BIZKAIKO UDALERRIETAN INGURUMENA HOBETZEKO 55 PROIEKTU ABIARAZI DITU FORU ALDUNDIAK, 4,5 MILIOI EUROREN BITARTEZ

Ostirala, 2011(e)ko Martxoaren 18a 10:00

Ingurumen Sailak balioetsi egin du toki erakundeek iraunkortasunaren alde agertu duten konpromisoa. Aurtengo ekitaldian, bi alderdi nabarmendu dira: eraginkortasun energetikoa hobetzeko proiektu asko egotea eta mugikortasun iraunkorra.

Bizkaiko Foru Aldundiko Ingurumen Sailak diruz lagunduko ditu ingurumena eta iraunkortasuna hobetzeko 55 ekimen, Bizkaiko Lurralde Historikoko hainbat udalerri eta mankomunitatek aurkeztutakoak. Proiektuok bultzatzeko, ia 7 milioi euroko (6.972.461) inbertsioa egingo da, eta Foru Aldundiak 4,5 milioi euroko diru-laguntza emango die. Diru-laguntza bat jasotzeko proiektua aurkeztu duten udaletako % 65k Foru Aldundiaren finantziazioa lortu dute. Toki erakundeek eskatutakoaren % 60-80 arteko diru-laguntza jaso dute, bakoitzak lortu duen puntuazioaren arabera: udalen proiektuek 160.000 euro jaso dute gehienez; mankomunitateetakoek, berriz, 320.000 euro.

2005. urtean hasi zen Bizkaiko udalerrietan Tokiko Agenda 21 direlakoetan jasotako ekintza-planak sustatzeko laguntzen programa. Handik hona, Bizkaiko Foru Aldundiak ia 29 milioi euro baino gehiago bideratu ditu 317 proiektu egiteko, hainbat arlotan: energia berriztagarriak, eraginkortasun energetikoa, mugikortasun iraunkorra, hondakinen kudeaketa, atsedenlekuen sorrera, narriatutako inguruen ingurumen-berreskurapena. Guztira, ia 72 milioi euroko inbertsioa egin da. 2011an, 85 proiektu aurkeztu dira, eta horietatik 30 baztertu egin dira, ez dutelako lortu eskatzen zen puntuazioa edo ez dutelako bete dekretu bidez arautu den diru-laguntzaren helburua.

2011an diruz lagundutako proiektuak

Jarduera-esparruen arabera, 55 proiektuak sei arlotan taldekatu daitezke:

· Eraginkortasun energetikoa eta energia berriztagarriak (20 proiektu):Arantzazu, Arrankudiaga, Balmaseda, Bedia, Dima, Garai, Gueñes, Igorre, Iurreta, Mallabia, Maruri-Jatabe, Mungia, Muskiz, Ortuellla, Portugalete, Sopuerta, Trapagaran, Zeanuri, Ziortza-Bolibar eta Lea-Artibaiko Mankomunitatea.

Helburu orokorrak: energia garbiak inplementatzea eta energia aurrezten laguntzea, ingurumena hobetzeko, eta, aldi berean, oraingo zerbitzu berak eta konfort pertsonalaren maila bera gordeta.

· Mugikortasun iraunkorra (11 proiektu): Arratzu, Galdakao, Munitibar-Arbazegi-Gerrikaitz, Sopelana, Zalla, Bilbo, Derio, Getxo, Orozko, Uribe Kostako Mankomunitatea eta Txorierri Zerbitzuen Mankomunitatea.

Helburu orokorrak: mugikortasun iraunkorra helburu hartuta, espazio publikoa egokitzea garraio publikoa bultzatzeko, eta oinezkoentzako zein bizikletan dabiltzanentzako beste mugikortasun sistema bat sustatzea, kutsadura, energiaren kontsumoa, giroko zarata eta istripuak gutxitzeko.

· Atsedenlekuak eta aisiarako guneak (10 proiektu):Ajangiz, Areatza, Bermeo, Berriz, Fruiz, Gorliz, Izurtza, Leioa, Ubide, Urduliz.

Helburu orokorrak: aire zabalean dauden atsedenlekuen sare oso bat sortzea eta inguruan ditugun gune degradatuak lehengoratzea.

· Hondakinen kudeaketa (4 proiektu):Busturia, Muxika, Arratiako Mankomunitatea eta Busturialdeko Mankomunitatea.

Helburu orokorrak: laguntza ematea hiri hondakinak gaika biltzeko eta birziklatzeko, eta herritarrei kalitatezko zerbitzu bat ematea, ingurumen-babeseko mailarik handiena izango duena.

· Ibilbide ekologikoak (4 proiektu):Alonsotegi, Larrabetzu, Mendata eta Zierbena.

Helburu orokorrak: natura-guneak lehengoratzea eta haien balioa ezagutaraztea.

· Ingurumenaren Interpretazio Zentroa (2 proiektu):Leako Landa Udalerrien Mankomunitatea eta Santurtzi.

· Beste batzuk (4 proiektu): Artzentales, Karrantza, Turtzios eta Zaldibar.

Tokiko Agenda 21:tresna egokia Bizkaiko udalerrien iraunkortasuna bultzatzeko

Gizarteari eta ingurumenari onura handia dakarkieten jarduerak dira, eta, beraz, bultzada ekonomiko handia jasotzen dute, tokiko agendak eta horietan jasotako ekintza-planak ezartzeko Aldundiak egiten duen apustu erabakiaren adierazgarri dena.

Foru Aldundiaren ustez, Tokiko Agenda 21 da tresnarik eraginkorrena udal iraunkorragoak, garbiagoak, osasuntsuagoak, zuzenagoak eta solidarioagoak egiteko, pertsona guztiek ahalik eta bizi-kalitate onena izan dezaten eta ingurumena ahalik eta gehien errespeta dadin. Esan daiteke Bizkaia dela lurralde bakarra udalerri guztietan duena Tokiko Agenda 21 delakoa onartuta eta gauzatzeko bidean.

Proiektuen ingurumen-ebaluazioa

Proiektu horien bitartez sustatu daiteke Bizkaiko udalerrietan CO₂-aren eta gai kutsagarrien igorpena gutxitzea, energia aurreztea eta zarata murriztea. Urtean-urtean, milaka lagunek ateratzen dute onura ekintza horietatik, zeren gure ingurua leku iraunkorragoa, osasungarria eta garbiagoa egiten baitute.Energia garbien ildoari dagokionez, proiektu gehiago aurkeztu dira arlo horretan. Hala, bada, guztira 1.681.632 euroko inbertsioa egin da eraginkortasun energetikoa hobetzeko eta energia berriztagarriko instalazioak abiarazteko proiektuetan, eta Ingurumen Sailak proiektuoi eman dien laguntza 1.234.285 euro izango da.

Beste alde batetik, nabarmentzekoa da diruz lagundutako jarduerek gizarteari dakarkioten onura. Halako proiektuen bitartez lortzen diren hobekuntzek ingurumena hobetzen dute zuzen-zuzenean, baina, horrez gainera, beste era bateko hobekuntzak sortzen dituzte zeharka, hala nola, arlo sozioekonomikoan. Udalerrietako auzoen arteko loturak hobetzea, zalantzarik gabe esan daiteke gizarterako onura handiena dakarren jardueretako bat dela. Era berean, udalerrien artean bidegorri sare bat sortzeak kirola egitea bultzatzen du, eta garraiobide alternatiboak erabiltzea sustatu, eta, hala, hobetu egiten da udalerrietako ingurumen-kalitatea.

2011ko ekitaldirako proiektuen zerrenda Bizkaimedian ikus daiteke.