Iñaki Markuerkiaga zinegotzia absolbitzea erabaki du epaileak
Muxika Garbiko zinegotziak deliturik egin ez duela erabaki du; Gainzak helegitea jartzeko aukera izango du
2010-04-07 | 17:09:54
Muxika Garbiko zinegotziak deliturik egin ez duela erabaki du; Gainzak helegitea jartzeko aukera izango du Gernika-Lumoko lehenengo instrukzio auzitegiak Iñaki Markuerkiaga Muxika Garbiko zinegotzia absolbitzea erabaki du. Iragan urteko urriaren 20an kaleratutako autoan, Jon Mikel Gainza alkateak 2008ko abenduan jarritako salaketa behin-behinean artxibatzea agindu zuen epaileak, delitua izan den edo ez erabakitzeko "froga nahikoa" ez zegoela iritzita. Hala ere, Gainzak helegitea jarri zuen, eta iragan martitzenera arte ez da auziaren berri izan berriro.
Markuerkiagak azaldu duenez, "gezurretan oinarritutako salaketa izan dela berretsi du epaileak beste behin". Hori dela eta, "orain arte bezala lanean jarraitzeko konpromisoa" hartu du zinegotziak.
Epaia hilaren 6an jakinarazi zuen epaileak, eta egun horretatik aurrera bost lan eguneko epea izango du Gainzak helegitea jarri nahi izanez gero.
Urtebetetik gora pasatu da
Markuerkiagaren aurkako salaketa 2008ko abenduaren 10ean jarri zuen alkateak. Egun horretan aurrekontuak onartzeko osoko bilkura izan zen, baina, batzarrean izandako "jarreragatik", batzar aretotik eta eraikinetik kaleratu zuten Muxika Garbiko zinegotzia.
Udalak bere garaian azaldu bezala, Markuerkiaga alkateari zuzendu zitzaion, "jarrera mehatxagarrian", eta "behin baino gehiagotan bultzadak" eman zizkion Gainzari, ez ziolako udaletxean sartzen uzten. Hala, salaketa "mehatxu, bortxa eta erasoagatik" jarri zuen alkateak.
Epaileak kaleratutako sententzian azaltzen denez, "jasotako deklarazioen bitartez egiaztatutako gertaerak aztertu ostean, desobedientzia faltagatik epaitzeko baldintzak ez dira betetzen". Gaineratu legez, "alkatearen deklarazioa aztertu ostean, ezin da zehaztu zergatik Gainzak ez zion utzi Markuerkiagari eraikin publiko batera sartzen". Epaileak dioenez, alkateak ez du eskumenik udaletxean nor sartzen den erabakitzeko. Hori dela eta, Gainzak "agintekeriaz" jardun zuela zehaztu du epaileak.
Era berean, jasotako deklarazioak kontuan hartuz gero, Markuerkiagak alkatea kolpatu zuela ezin daitekeela egiaztatu azaltzen du epaiak. Bertan argitzen denez, "gorpu biak kontaktuan izan ziren", baina ezin da zehaztu nork hasi zuen eztabaida. Hori dela eta, absoluzioa agindu du Gernika-Lumoko auzitegiak.
Comentarios