MUXIKAKO UDALEKO ALKATE JAUNARI.-
Muxikako Udaleko osoko bilkurak, 2010ko maiatzaren 5ean egindako bileran, hasierako onespena eman zion Muxikako Hiria Antolatzeko Plan Orokorrari, 2010ko ekainaren 30an BAOk 123. zenbakian argitaratzen duen bezala, alegazioak aurkezteko berrogei eguneko epea zabalduz.
B.A.E., NAN …zenbakidunak, Gautegiz Arteagako biztanleak, "BUSTURIALDEAN LAN ETA BIZI" ekimeneko EHNE, ELA, LAB, BUSTURIALDEKO EZKER ABERTZALEA, GERNIKA-LUMOKO EKOLOGI TAILERRA, ZAIN DEZAGUN URDAIBAI, IEUP! GAZTE ASANBLADA eta ARALAR, gizarte eragileen izenean, jakinarazpenetarako honako helbide honetan helbideratuak, Zelaieta 20; 48314 GAUTEGIZ ARTEAGA,
ALEGAZIO HAUEK EGIN NAHI DITUGU:
Gaian sartu baino lehenago, azaldu nahiko genuke zein den iragarpen honen aurrean gure jarrera. Muxikako Plan Orokorrak bere herria antolatzeko dagokion eskubide eta aukeren aurrean ez dugu ezer esango. Muxikako herritarrekin solidarioak izan arren, eurei dagokie, oinarrian, behar diren azterketa eta, kasuan, proposamenak egitea ere.
Baina Muxikako herriaren aurrean aurkezten den "Muxika Hiria Antolatzeko Plan Orokorraren" barruan, Muxikako Udalak berak bultzatutako Arau Subsidiarioen Aldaketa garrantzitsu bat sartzen dela ikusten dugu era berean: "Miango-Agerre-Untxeka" jarduera ekonomikoen lurzoru urbanizagarrizko sektore berri bat sortzeko aldaketa, hain zuzen ere. Kontuan hartuta erabaki honen oihartzuna Udalaren mugak gainditzen duela eta kontraesanetan jartzen dutela Urdaibairen garapen sozioekonomiko iraunkorraren aldeko onartuta dauden Planak, idazki hau izenpetzen dugunok berriro ere, azkeneko hamarkada honetan egin dugun bezala, aurkeztu nahiko genuke erabaki honen aurrean dugun desadostasunarekin batera, eskualdeko garapenerako geure iritzi baikor eta parte hartzailea ere.
1.-Azken honetaz arituko gara beraz. Eta hasteko zera diogu, orain arte Udal horren aurrean Arau Subsidiarioen Aldaketen tramiteak iraun zuen bitartean esandakoak birbaieztatzen ditugula. Funtsean, eta labur bilduta, hauexek dira Aldaketa honen, Muxika Hiria Antolatzeko Plan Orokorrak aintzakotzat hartzen duenaren Aldaketaren ezaugarririk esanguratsuenak:
1.1.- Onartutako garapen ereduaren aldaketa.
Eskualdeari dagokio bere garapen iraunkorraren eredua egitea. Hau, nolabait, egina dago eta, zerbait falta arren, badago garapen iraunkorra burutzeko adinako tresneriarik, hala nola, Urdaibaiko Legea, Urdaibaiko Gidari Plana edota JASEGE/PADAS, etab.
Muxikako Udalbatzak eta beste goi mailako erakunde publikoen arduradunak, berriz, ez dute eredu hau errespetatu:
· Ez dute ez azaleraren multzoaren ez eta kokapenaren inolako justifikaziorik plazaratu. Zergatik hasieran 148 Ha, gero 233 Ha., gero 85 eta orain 58 Ha. ko industria gunea? Geure galdera areagotzen da oraindik, aldaketaren azkeneko tramitean, Udalbatzak 16/20 urteko lehenengo fase baterako, 16 Ha.ko azalera nahikoa zela onartzen zuela jakinda, kontuan izanda, halaber, azalera horren barnean Komertzio gune erraldoi baterako 4 Ha.ko azalera aurreikusten zela.
· Horretarako eta gehiagorako badago lekurik Gernika-Lumon: 20, 3 Ha. libre daude, industriarako kalifikatutako azaleraren % 39a.
· JASEGE/PADASaren bere bigarren helburu estrategikoak, EAEko Jarduera ekonomikoetarako PTSak, Gernika-Markinako PTParen aurrerapenak, inora joan baino lehenago, "industri sektoreak lehenengo eta batez ere hondaturiko aldeak berreskuratu beharko dituela" azpimarratzen dute, logikak berak, bestalde, adierazten duen bezala.
· Onartutako eskualderako eredua zeharo aldatzen dute. Urdaibaiko Gidari Planak, "Miango-Agerre-Untxeka" lurzorua "Landa Lurra" bezala sailkatzen du. Sailkapen honen xedea, baliabide naturalak, nekazaritzakoak eta abar, babestea, antolatzea, kontserbatzea eta hobetzea dela azpimarratzen du Gidari Planaren 58. atalak.
· Hondaturiko edota libre dauden Gernika-Lumoko industri sektoreak, alderantziz, onartutako ereduaren helburuak bete beharrean, gehiago hondatuko dira, ez badira espekulatzaileen eskuetan erortzen, garapen iraunkor eta orekatua gehiago zapuztuz.
1.2.- Urdaibaiko Gidari Plana errotik aldatuta.
· Urdaibaiko Lege pean dagon Gidari Plan Dekretuak "Landa Lurra" bezala sailkaturiko "Miango-Agerre-Untxeka" lurzorua, "Landa-lur Arrunteko Eremu" bezala kalifikatzen du zehazki. "Landa-lur arrunteko" kalifikazioaren helburu nagusia baserrietako paisaia eta lurzorurik onenak babestean, garapen sozioekonomikoa eta baserri aldeko bizi kalitatea bultzatzean, ingurunea errespetatzean, … datza (68.Atala).
· Horrela sailkatu eta kalifikatutako eremuak ez dira urbanizagarriak (4. etab Atalak). Udal Hirigintza Planak beraz, ezin dute horrela sailkatu edota kalifikatutako eremuak antolatu.
· Aurre ikusten da, dena den, beharrizanez gero, badagoela Urdaibaiko Gidari Plana aldatzeko eta berraztertzeko prozedurarik (10 eta 11. Atalak). Ez dira kasu honetan erabili.
· Erabili den prozedura Udal Hiriaren Planaren (Arau Subsidiarioen) aldaketa izan da, zer ikusirik ez daukanak "Landa Lur" edota "Landa-lur Arrunteko" eremuen sailkapen eta kalifikazioarekin, hau da, Urdaibaiko Gidari Planaren antolaketarekin.
· Muxikako Udalak bada, bere muga barruko eremu urbanizagarritzat legez antolatu du "Miango-Agerre-Untxeka", "Landa Lur" edota "Landa-Lur Arrunteko" sailkatu eta kalifikatutako lurzorua.
· Are gehiago, hasieratik eta tramitea amaitu arte, aldaketa, lotsarik gabe, "puntuala" legez onartua izan da (begira, BAO 208. zk. 2009ko urriaren 30koa).
1.3.- Prozedura traketsa, inposaketaren ezaugarri.
Zaila da honelako erabaki larriaren ondorioz, urrats garden eta garbiak ematea behin betiko onespenaren tramitazioa amaitu arte. Ez dugu historia guztia gogoratuko.
· 2005ko uztailean behin behineko onespena hartu ondoren, 2007ko maiatzaren 16an, Udal hauteskunde kanpainan, Muxikako Alkateak goizeko 8etan, jendeari ezer esan barik, "premiako bilkura berezi bat" (sic) deitu zuen aipatu Aldaketak behin behineko onarpena, probisionala, har ditzan. Udaletxeko Idazkariak legalitatearen aurkako txostena aurkeztu zuen Urdaibaiko Patronatuko onespena ez izateagatik eta Gernika-Markina PTParekin bat etorri behar zelako. A eta guzti ere, Udalbatzak onartu zuen aldaketa.
· Sasoi berean, Foru Aldundiko Ingurumen zuzendaritzak akats larriak goraipatu zituen, eta Urdaibaiko Patronatuko teknikariek Aldaketaren kontra adierazi ziren. Muxikako Alkatea, berriz, Patronatuko ezezkoaren jakinean gain, beronen Batzarreko gai ordenatik Aldaketaren gaia kentzeko eskatu zion Patronatuari.
· 2007ko urrian EAJ-ko ordezkariek, eskualdeko eta Aldundikoak, Patronatuko bilkuratik alde egin zuten, beronek Muxikako Udalak eginiko Aldaketaren eskaria atzera botako zuela ikusiz. Urdaibaiko Patronatuak, hain zuzen, Muxikako Udalak Aldaketak Erreserban eragingo zuten ondorioak neurtzeko gaitasunik ez zuela, azpimarratu zuen.
· 2009ko martxoko Patronatuaren bilkura hasi baino lehenago (EAEko hauteskundeen bezperetan oraingo honetan), Bizkaiko Foru Aldundiko ordezkariak Aldaketaren aldeko txosten propio bat sartu zuen, bilkuran aurkeztuko zenaren kontrakoen ordez, Patronatuak bere eskubideak gainditzen zituztela argudiatuz.
· Handik eta lasterrera, Foru Aldundiko Garraio eta Hirigintza Sailaren 1028/2009 Foru Aginduak aipatu "Aldaketa puntuala" behin betiko onesten du eta urte honetako otsailaren 17an Aldaketaren Araubidezko Testua argitaratzen du.
· Udaletxeko prozedura administratibo guztian zehar, gaiaz interesatuta, idazkiz eta behar ziren forma eta epeetan Muxikako udaletxean geure alegazioak aurkeztu arren, ez dugu harrezkero Administrazioak egindako hurrengo urratsen berririk izan, 2007an eta 2008an gutunak ere zuzendu arren eskualdeko Alkate guztiei, Ahaldun Nagusiari eta Eusko Jaurlaritzako Industria eta Ingurumen Sailburuei. Oraintsu bertan, aurtengo martxoan igorri diegu gutun bana Bizkaiko Ahaldun Nagusiari eta Jaurlaritzako Lehendakariari, beti ere elkarrizketak eskatuz eskualdearen egoera larriak auzo lanaz eta guztion parte hartzeaz konpondu dezagun. Besteak beste, izenpetzen dugunok, behintzat, eskualdeko aniztasunaren gehiengo sozial bat osatu eta ordezkatzen dugulakoan gaude.
· Udalbatzak, bestalde, bere Planaren aldaketa justifikatzeko ez du proiektu alternatiborik aurkeztu, objektiboki eskualdeko ereduen eta Gidari Planaren aldaketa izan arren.
· Azpimarratu behar dena, trakestasun hauen ondorioz, erakunde publikoen arduradunek, bai bertoko udaletxeak eta bertoko herritarrok ere apartatu egin gaituela geuri dagokigun eskualdearen garapenaren aldaketa eta antolaketatik.
· Argi dago zein zen Administrazioko arduradunen planteaketa: eskualdeko arazoa izan arren, Muxikako Udaletxeak duen Hirigintza Planaren bidez egingo da aldaketa eta aldaketa "puntuala" moduan hartuta gainera. Zertarako? Arinago egiteko? Inor enteratzekotan Muxikako herritarrak bakarrik izan ditzaten? Tamalez, baina eskubide osoz, jakina, esan dezakegu eskualde osoari iruzurra egin zaiola.
2.- Laburpen gisa.
2.1.- Industria gunea eta Muxikako Hiria Antolatzeko Plan Orokorra (HAPO).
Helburu printzipalen artean Plan Orokorrak "HAPOera ekartzea "Miango-Agerre-Untxeka" industri lurzoru sektorea (eskualdeko industrialdea)" markatzen du. Kanpoan egindako produktu bat "ekarri" edo barrutik bultzatutakoa lortu? Ñabardurak ñabardura, azken batean, Muxikako Udalbatzak, beste goi mailako erakundeen laguntzarekin, lortu du, administrazioari dagokionagatik behintzat, Urdaibaiko Legearen pean dagon eta Gidari Planari bakarrik dagokion eremu sailkapenaren aldaketa Udal Plan Orokorraren barruan sartzea eta honekin batera, eskualdeko garapen iraunkorraren eredua aldatzea ere lortu du.
2.2.- Udalaren gaitasun eza.
Hastapenetan esandakoak kontuan hartuz, Muxikako Udalbatzak eta industria gunerako aldaketaren onespenean parte hartu duten erakundeak, Urdaibaiko Gidari Planaren aldaketaren bidea hartu beharrean, geure irudiz, organo arras inkonpetente baten bidea hartu dute, Muxikako Arau Subsidiarioen Aldaketaren bidea, hain zuzen, zer ikusirik ez daukanak Gidari Planaren antolaketarekin.
2.3.- Urdaibaiko Lege eta Dekretuen zapuzketa.
HAPOean sartzen den Muxikako Arau Subsidiarioen Aldaketa Urdaibaiko Gidari Plana ez ezik, Busturialdeko garapen iraunkorraren eredua ere, JASEGE/PADAS, eusko Jaurlaritzaren 258/1998 Dekretua, zapuzten du.
2.4.- Inposaketa.
Argi dago, 1.3. puntuan azaldutako ildotik, hainbestetan eskatu arren, ez dela parte hartzean eta elkarrizketan oinarritu Aldaketa hau, bide traketsetan eta inposaketetan baizik, orain erabiltzen diren parte hartzerako irizpide demokratikoak eta hain zuzen ere JASEGE/PADASen 5. helburu estrategikoa edota 10. estrategia ere zapalduz.
ONDORIOA:
Muxikako Alkate Jaunari eta Udalbatzari eskatzen diegu beraz, aurreko arrazoietan oinarrituta, Muxikako HAPOera eroan beharrean "Miango-Agerre-Untxeka" industri lurzoru sektorea (eskualdeko industrialdea), eta sartuta dagon heinean behin behineko onarpena hartu zuenetik, atera dezaten HAPOetik, era horretan inoiz sartuta egon behar ez zen eskualdeko industrialdea hori.
Era berean, adierazi nahiko genuke beste behin ere, hamarkada honetan eskualderako industria gunearen gaia hasi zenetik, batez ere, baikorki eta leialki azpimarratzen egon garena, hau da, Busturialdearen garapen iraunkorra elkarrizketa eta auzolanean oinarritu behar zela, are gehiago kontuan izanda jarduera sozioekonomikoen 1998ko Gara penerako Egitamua (JASEGE/PADAS) eskualdeko eragile ezberdinekin adostu eta gero Dekretuz eusko Jaurlaritzan onartua izan ondoren. Horretan oinarrituta ikusi nahiko genuke geure eskualdearen oraingoa eta etorkizuna.
Zori txarrez ez da horrela jasotzen, eta ikusiz, alde batetik, oztopatzen gaituztela elkarrizketaren bidea, eta bestetik, erakunde publikoen arduradunak eurek onartutako lege tresneria bera ere ez dutela errespetatzen, guk nahi ez dugun beste bide bat zabaltzera behartuta aurkitzen gara, prozedura juridikoarena, hain zuzen ere.
Kontuan hartuta beraz, Udala organo zeharo inkonpetentea dela Urdaibaiko Gidari Plana aldatzeko eta ez denez Gidari Plan honen aldaketarik egin industria gunea Muxikan koka dezan, Muxikako Alkate eta Udalbatzako partaideei komunikatzen diegu ilaren 3an erregistratu genuela Foru Aldundiko Garraio eta Hirigintzako foru Diputatu Andereari zuzendutako idazki bi, nuluak direla eta bertan behera utz dezatela bai Aldaketaren onespenaren Foru Agindua eta baita Muxikako Arau Subsidiarioen Aldaketaren Araubidezko Testua, eskatuz.
Behar diren epe eta eran egina,
"BUSTURIALDEAN LAN ETA BIZI" ekimeneko EHNE, ELA, LAB, BUSTURIALDEKO EZKER ABERTZALEA, GERNIKA-LUMOKO EKOLOGI TAILERRA, ZAIN DEZAGUN URDAIBAI, IEUP! GAZTE ASANBLADA eta ARALAR, gizarte eragileen izenean,
Comentarios